पुणे,दि.१० :- टोलनाक्यावर सुरक्षारक्षकाची नोकरी करणाऱ्या व जम्मू काश्मिरमधील जिल्हा न्यायदंडाधिकाऱ्यांची बनावट स्वाक्षरीने बनावट शस्त्र परवाना बाळगून पुण्यात उत्तर प्रदेश आणि जम्मू काश्मीरमधील ८ जणांना वानवडी पोलिसांनी अटक केली आहे. अटक करण्यात आलेल्या आरोपींकडून देशी बनावटीचे पिस्तूल, १२ बोअरची बंदूक, ५६ काडतुसे, 3 बनावट शस्त्र परवाने असा एकूण ६ लाख ५१ हजार रुपयांचा मुद्देमाल जप्त केला आहे.संतोष जैनाथ शुक्ला Santosh (वय ५० रा. भागीरथी नगर, साडेसतरा नळी, हडपसर, मूळ रा. प्रयागराज, उत्तर प्रदेश), रामप्रसाद बुध्दा पासवान (वय ३५, रा. भिंगारवाडी, ता. पनवेल, जि. रायगड, मूळ रा. फतेहपूर उत्तर प्रदेश), राजेश बबलू पासवान (वय ३५ रा. फतेहपूर, अशोकनगर, उत्तरप्रदेश), दिनेश जगदीश पासवान व (वय ५४ रा. गोपीपूर, उत्तर प्रदेश), इम्रान मोहमद जिमी खान (वय ३० रा. राजोरी, जम्मूकाश्मिर), मोहंमद बिलाल मोहंमद निसार (वय ३० रा. मंजापूर, जम्मू काश्मीर जम्मू काश्मीर), साहिलकुमार चमनलाल शर्मा (वय २५ रा. राजोरी, जम्मू काश्मिर), गीतम देशराय शर्मा (वय २३, रा. राजोरी, जम्मू काश्मिर) अशी अटक करण्यात आलेल्या सुरक्षारक्षकांची नावे आहेत.
वानवडी पोलिसांनी जुलै महिन्यात संतोष शुक्ला याला पेट्रोलींग दरम्यान हडपसर परिसरातील रामटेकडी परिसरातून अटक केली होती. त्यावेळी त्याच्याकडून देशी बनावटीचे पिस्तूल जप्त करण्यात आले होते.
पोलिसांनी आरोपीकडे सखोल चौकशी केली असता त्याच्या इतर साथिदारांकडे बंदुक असून त्यांच्याकडे
शस्त्र परवाना असल्याचे सांगितले होते. वानवडी पोलिसांनी तळेगाव दाभाडे परिसरातील टोलनाक्यावर सुरक्षारक्षक
म्हणून काम करणाऱ्यांना ताब्यात घेऊन तपास केला.
तपासादरम्यान त्यांच्याकडे असलेले शस्त्र परवाने बनावट असल्याचे समोर आले.
तसेच पोलिसांनी त्यांच्याकडील शस्त्र परवाने तपासले तेव्हा शस्त्र परवान्यावर जम्मू काश्मीरमधील
जिल्हा न्यायदंडाधिकारी यांची बनावट स्वाक्षरी असल्याचे
उघडकीस आले. पोलिसांनी आरोपींच्या घराची तपासणी करुन १२ बोअरची बंदुक, ५६ काडतुसे,
तीन बनावट शस्त्र परवाने जप्त केली. पुढील तपास वरिष्ठ पोलीस निरीक्षक भाऊसाहेब पटारे
यांच्या मार्गदर्शनाखाली तपास करण्यात येत आहे.
