पुणे- दि १९ : मागील काही दिवसांपासून विविध डिजिटल मंच आणि मोबाइल ॲपच्या माध्यमातून झटपट कर्ज देण्याच्या नावाखाली ग्राहकांची फसवणूक केली जात आहे. तेव्हा अशा कर्ज देणाऱ्या संस्थांकडून ग्राहकांनी सावध राहावे, असे आवाहन रिझर्व्ह बँक ऑफ इंडियाचे मुख्य महाव्यवस्थापक योगेश दयाल यांनी केले आहे.
जलद आणि विनाअडचण कर्ज मिळण्याची वचने देणाऱ्या अनधिकृत डिजिटल मंच व मोबाइल ॲपचे प्रमाण मागील काही दिवसांत वाढले आहे. कर्जदारांकडून अधिक व्याजदर व छुपे आकार मागण्यात येत आहेत. त्याचप्रमाणे कर्जवसुलीसाठी दडपशाहीच्या पद्धतीचा अवलंब केला जात असल्याच्या तक्रारी आरबीआयकडे प्राप्त झाल्या आहेत. या संस्थांकडून फोनमधील डाटा मिळविण्यासाठी कराराचा गैरवापरही केला जात आहे. तेव्हा ग्राहकांनी अशा कर्ज देणाऱ्या संस्थांच्या आमिषाला बळी पडू नये. केवायसी (नो युवर कस्टमर) कागदपत्रांच्या प्रती अज्ञात व्यक्ती आणि अनधिकृत ॲप्सबरोबर कधीही शेअर करू नयेत. अशा अनधिकृत ॲप्सना बँक खात्याची माहिती देऊ नये. यासंदर्भात ऑनलाइन तक्रार दाखल करण्यासाठी (https://sachet.rbi.org.in) या पोर्टलचा उपयोग करावा. अधिक माहितीसाठी https://cms.rbi.org.in. यावर संपर्क साधण्याचे आवाहन करण्यात आले आहे.