कर्जत: दि २६ :- कर्जत तालुक्यातील गणेशवाडी येथे अवैध वाळू उपसा करणाऱ्या वाळू माफियांवर कर्जत पोलिसांनी कारवाईचा बडगा उगारला. उपविभागीय पोलीस अधिकारी आण्णासाहेब जाधव,यांच्या मार्गदर्शनाखाली गणेशवाडी शिवारात भीमा नदी पात्रात कर्जत पोलिसांनी मोठी कारवाई केली.कारवाईमध्ये एकूण १५ लाख रुपये किमतीच्या ४३ यांत्रिक लोखंडी फायबर बोटी व नऊ लाख रुपये किमतीच्या तीन सेक्शन बोट असा एकूण २४लाख रुपये किंमतीचा मुद्देमाल नष्ट करण्यात आला आहे.तर सहा जणांवर गुन्हे दाखल करण्यात आले असुन, त्यापैकी दोन जणांना ताब्यात घेण्यात आले आहे.पोलिसांच्या या धडक कारवाईने कर्जत तालुक्यातील वाळू माफियांचे धाबे चांगलेच दणाणले आहेत.
कर्जत तालुक्यातील गणेशवाडी शिवारात मोठया प्रमाणात वाळू उपसा सुरु होता.याबाबत पोलीस निरीक्षक चंद्रशेखर यादव यांना गुप्त बातमीदारा मार्फत माहिती मिळताच त्यांनी पोलीस उपनिरीक्षक शिरसाट यांना आदेश देऊन पोलिस पथकांसह घटनास्थळी दाखल होण्यास सांगितले असता त्या ठिकाणी फायबर बोटींच्या माध्यमातून वाळू उपसा सुरू असल्याचे आढळून आले. वाळू माफियांना पोलिसांची चाहूल लागताच पसार होण्याच्या प्रयत्नात असलेल्यांना पोलिसांनी ताब्यात घेतले.
या प्रकरणी लहू बबलू शेख,रा.पिअरपूर, झारखंड, शौकत बच्चू शेख,रा.पळसगच्ची, झारखंड, भरत बलभीम अमनर, रा.वाटलुज,ता.दौंड, जि.पुणे,शरद शेंडगे रा. वाटलुज, ता.दौंड,जि. पुणे,दत्तात्रय विक्रम खताळ, रा. गणेशवाडी, ता. कर्जत,जि.अहमदनगर ,अंकुश ठोंबरे रा. गणेशवाडी, ता.कर्जत,जि.अहमदनगर यापैकी दोन जणांना ताब्यात घेण्यात आले आहे.
सदरची कारवाई ही पोलीस निरीक्षक चंद्रशेखर यादव,
पोलीस उपनिरीक्षक भगवान शिरसाट,पोलीस हेडकॉन्स्टेबल तुळशीराम सातपुते, मारुती काळे, सुनील खैरे, सागर म्हेत्रे, मनोज लातूरकर, भाऊसाहेब काळे, संपत शिंदे यांनी केली.
श्रीगोंदा प्रतिनिधी :-विजय कुंडलिक मांडे