कर्जत दि २७ :- कर्जत व राशीन भागातील नागरिकांना कोरोनाची चाचणी करण्यासाठी सरकारी हॉस्पिटलमध्ये जावे लागत होते. मात्र, आता या सर्वांसाठी एक चांगली बातमी असून कर्जत व राशीनमध्ये १७ ठिकाणी खासगी लॅब चालकांकडून रॅपिड अँटिजेन कोरोना टेस्ट मोफत केंद्र सुरु करण्यात आले आहे. कर्जत तालुक्यातील अनेक गावांतील नागरिकांना अनेक संकटांना तोंड द्यावे लागत होते. काही नागरिकांच्या चाचण्या होत नव्हत्या. तर अनेकांना या संदर्भात मनस्ताप सहन करावा लागत होता.या अनुषंगाने पोलीस निरीक्षकचंद्रशेखर यादव यांनी सर्व लॅब चालक यांचेशी चर्चा करून रॅपिड टेस्ट करण्यासाठीचे किट आणि मास्क प्रांत अर्चना नष्टे, तहसीलदार नानासाहेब आगळे, गटविकास अधिकारी अमोल जाधव, तालुका आरोग्य अधिकारी संदीप पुंड यांच्या हस्ते लॅब चालकांना देण्यात आले. या सर्व टेस्टसचा डेटा हा तालुका आरोग्य कार्यालयात ठेवण्यात येणार आहे. वेळोवेळी प्रशासनाचे प्रतिनिधी सदर ठिकाणी टेस्टिंग वेळी उपस्थित राहणार आहेत.
यामुळे कर्जत व राशीन ग्रामस्थांना कोरोना चाचणी करणे आता सोयीस्कर होणार असून लोकांचा वेळ वाचणार आहे. तसेच गर्दीचे प्रमाण देखील कमी होणार आहे. या टेस्टची सर्व माहिती रोजचे रोज प्रशासनाला उपलब्ध होणार आहे. त्यामुळे कोरोनाची लागण झालेल्या नागरिकांवर लवकर उपचार करता येणार आहेत आणि कॉन्टॅक्ट ट्रेसिंग सुध्दा करता येणार आहे.या उपक्रमामुळे तालुक्यात जास्तीत जास्त कोरोना टेस्ट होतील व कोरोना संसर्ग हा नियंत्रणात आणण्यास खूप मोठी मदत होणार आहे. तरी सर्व ग्रामस्थांनी यापुढे कर्जत येथील १० लॅब व राशीन येथील ७ लॅब मध्ये मोफत रॅपिड एंटीजन चाचणी करून मिळणार आहे. त्यामुळे जास्तीत जास्त नागरिकांनी त्या ठिकाणी जाऊन आपली कोरोना टेस्ट करून घ्यावी.असे आवाहन पोलीस निरीक्षक चंद्रशेखर यादव यांनी केले आहे.सर्वसामान्य नागरिक हे काही त्रास होत असल्यास डॉक्टरांकडे जातात. त्यांना काय होतंय याची माहिती देतात. तसेच नागरिक काहीतरी आजार किंवा लक्षणे असल्यास पॅथॉलॉजी लॅब मध्ये वेगवेगळ्या टेस्ट करण्यासाठी जातात. जर या सर्व डॉक्टरांना आणि पॅथॉलॉजी लॅब यांनी प्रशासनाला सहकार्य केल्यास कोरोना सदृश्य लक्षणे असलेले नागरिक तात्काळ मिळून येतील आणि त्यांच्या लवकर टेस्ट करून कोरोना असल्यास तात्काळ उपचार करता येतील. हा विचार करून पोलीस निरीक्षक चंद्रशेखर यादव यांनी कर्जत येथील १० आणि राशीन येथील ७ पॅथॉलॉजी लॅब चालकांची कर्जत पोलीस स्टेशन तसेच राशीन पोलीस दुरक्षेत्र येथे पोलीस जवान मनोज लातूरकर, गोवर्धन कदम, गणेश भागडे यांच्या मदतीने मीटिंग बोलावली. जास्तीत जास्त लोकांच्या टेस्ट केल्यास कसा फायदा होईल, नागरिकांची कोरोना टेस्ट करण्यासाठी कशी सोय करणे आवश्यक आहे.याबाबत चर्चा केली. प्रशासन रॅपिड अँटीजन किट,मास्क आणि हॅन्ड ग्लोज उपलब्ध करून देतील आपण टेस्ट करा अशा आवाहनावरून हे १७ लॅब चालक आता विनामूल्य कोरोना टेस्ट करण्यासाठी तयार झाले आहेत. या बाबत डॉक्टरांना सुद्धा आपण पेशंट आला की त्याची लॅब मध्ये कोरोना टेस्ट करावी असे सांगण्यात आले आहे.
श्रीगोंदा प्रतिनिधी :-विजय कुंडलिक मांडे