कर्जत,दि.१७ :- तालुक्यात दिवसाही घरफोड्यांच्या घटना सुरू आहेत. त्यामुळे पोलिसांनी गस्त घालून आरोपींची शोधमोहीम सुरू केली आहे. त्यानुसार तपास पथकातील पोलीस अमलदार पांडुरंग भांडवलकर व श्याम जाधव गस्तीवर होते. हंडाळवाडी गावच्या शिवारात एका मोटरसायकलवर तिघे संशयित फिरताना दिसल्याने त्यांना पोलिसांनी थांबण्यास सांगितले. मात्र पोलिसांना पाहून ते पळून जाऊ लागल्याने पोलिसांना संशय आला. त्यांनी पाठलाग सुरू केला. काही अंतरावर त्यांना अडविण्यात पोलिसांना यश आले. पाठीमागे बसलेल्या एकाला पोलिसांनी पकडले. तेव्हा दोघे दुचाकीसह पळून जाऊ लागले. मात्र पकडलेल्या आरोपीने पोलीस अंमलदार पांडुरंग भांडवलकर यांच्याशी झटापट सुरू केली. पोलिसांची व आरोपींची चाललेली झटापट पाहून मोटरसायकल वर पुढे गेलेले दोघे पुन्हा मागे आले. त्यांनी पोलिसांच्या ताब्यातून आपल्या साथीदाराला सोडविले. त्यासाठी पोलिसांवर दगडफेक केली. यात भांडवलकर जखमी झाले आणि तिघेही आरोपी जंगलाच्या दिशेने पळून गेले.
संशयित आरोपींना पोलिसांनी पाठलाग करून पकडले. मात्र, पोलिसांवर दगडफेक करून ते पळून जाऊ लागले. पोलिसांनी प्रसंगावधान राखून ही माहिती आपल्या वरिष्ठांना कळविली. पोलिस निरीक्षक चंद्रशेखर यादव यांनी तत्काळ ग्रामसुरक्षा यंत्रणेद्वारे संदेश पाठवून आरोपींचे वर्णन कळविले आणि ज्या कोणाला आरोपी दिसतील त्यांनी पकडून ठेवण्याची सूचना केली. पोलिसांचा संदेश ऐकून परिसरातील ग्रामस्थ सावध झाले. पुढच्या गावात यातील दोघा आरोपींना पकडण्यात यश आले. आरोपींनी केलेल्या दगडफेकीत पोलिस जखमी झाले आहेत. कर्जत तालुक्यातील हंडाळवाडी गावात भर दिवसा हा प्रकार घडला. पोलिस आणि ग्रामस्थांच्या सोयीसाठी कार्यान्वित करण्यात आलेल्या ग्रामसुरक्षा यंत्रणेचा उपयोग यामुळे पुन्हा एकदा अधोरेखित झाला आहे.
यानंतर पोलिसांनी हा प्रकार पोलिस निरीक्षक चंद्रशेखर यादव यांना कळविला. यासाठी गावकऱ्यांची मदत घेता येईल, असे वाटून यादव यांनी तातडीने तालुक्याच्या ग्रामसुरक्षा यंत्रणेद्वारे संदेश पाठवून आरोपींचे वर्णन कळविले. त्यांना पकडून पोलिसांशी संपर्क करा, असे आवाहन ग्रामस्थांना केले.
हा संदेश परिसरातील ग्रामस्थांनी ऐकला आणि सर्वजण सावध झाले. जवळच्यात सितपूर गावात ग्रामस्थांना हे संशयित दिसले. त्यातील एकाला पकडण्यात त्यांना यश आले. त्याने त्याचे नाव छगन चिंतामण काळे (रा. कडा, ता. आष्टी) असे सांगितले. त्याचे दोन साथीदार ग्रामस्थांना चकवा देऊन पुढे पळून जाण्यात यशस्वी झाले. पुढे नागलवाडी शिवारातही ग्रामस्थ सावध झालेले होते. त्यांना हे दोघे संशयित दिसले. तोपर्यंत त्यांचा पाठलाग करीत पोलीसही आले होते. त्यांनी कुकड्या उर्फ प्रफुल हाबाजी भोसले (रा. पिंपरखेड, ता. आष्टी) याला पकडले. तरीही एक जण पुढे पळून गेला होता. त्यानेही पळून जाताना दगडफेक केली. त्यामध्ये पोलिस अंमलदार रवींद्र वाघ जखमी झाले. पोलिसांनी त्या परिसरात आणि गावकऱ्यांनीही पुढे त्याचा शोध घेतला.
मात्र, झाडाझुडपातून तो पळून जाण्यात यशस्वी झाला. शेजारच्या आष्टी तालुक्यात तो पळून गेला असावा.
पकडण्यात आलेल्या दोघांना पोलिस ठाण्यात आणण्यात आले. त्यांच्याविरुद्ध आधीच्या गुन्ह्यांसोबतच आता पोलिसांवर हल्ला केल्याचा गुन्हाही दाखल करण्यात आला. त्यांच्याकडे पोलिस आता कसून चौकशी करीत आहेत. त्यांनी निमगाव गांगर्डा, चापडगाव या ठिकाणी घरफोड्या केल्याचे निष्पन्न झाले आहे. कर्जत, जामखेड, आष्टी तालुक्यातही त्यांच्याविरुद्ध गंभीर गुन्हे दाखल आहेत. कर्जत पोलीस ठाण्याचे पोलीस निरीक्षक चंद्रशेखर यादव, सहाय्यक पोलीस निरीक्षक सतीश गावित, दिनकर मुंढे, पोलीस उपनिरीक्षक अमरजित मोरे, भगवान शिरसाठ, पोलीस अंमलदार पांडुरंग भांडवलकर, श्याम जाधव, संतोष फुंदे, रवींद्र वाघ, वैभव सुपेकर, गोवर्धन कदम यांच्यासह शिदपूर आणि नागलवाडी परिसरातील ग्रामस्थांच्या तत्परतेमुळे हे आरोपी पकडले गेले आहेत.
श्रीगोंदा प्रतिनिधी :-विजय कुंडलिक मांडे