पुणे दि 18 :- कोरोना विषाणू प्रतिबंधात्मक कायद्या अंतर्गत पुणे शहरातील शिवाजीनगर येथील 5 विदेशी मद्य वाईन चे दुकान सील करण्यात आले आहे. कोरोना विषाणूचा प्रादुर्भाव रोखण्याकरीता पुणे महापालिका आयुक्त विक्रम कुमार यांनी निर्गमित केलेल्या आदेशान्वये पुणे शहरातील प्रतिबंधित क्षेत्राबाहेरील जीवनावश्यक सेवा , जीवनावश्यक सेवा व्यतिरिक्त दुकाने , मार्केट सकाळी 9 ते सायंकाळी 7 वाजेपर्यंत लॉक डाउन
काळात टप्पे निहाय सुरू करण्यात आलेली आहेत . तसेच दुकान व मार्केटमध्ये येत असलेल्या नागरिकांनी मुख पट्टी ( फेस मास्क ) वापरणे , सामाजिक अंतर ठेवणे , वेळोवेळी परिसर सॅनिटाइज करणे इत्यादी बंधनकारक करण्यात आले आहे . वेळोवेळी निर्गमित आदेशाचे पालन होत नसल्याचे निदर्शनास येत असून शिवाजी नगर मधील विदेशी मद्य वाइनच्या दुकानात येणाऱ्या नागरिकांनी मुख पट्टी ( फेस मास्क ) न वापरणे , सामाजिक अंतर न ठेवणे व दुकान मालकाने दुकान व आजूबाजूचा परिसर सॅनिटाइज न करता आदेशाचे उल्लंघन केले आहे . त्यामुळे या दुकानावर अतिक्रमण विभागाच्या वतीने कारवाई करून सदरचे दुकान सील करण्यात आले . याप्रसंगी अतिक्रमण विभागाचे मा . उपायुक्त माधव जगताप यांचे नियंत्रणाखाली सदरची कारवाई करण्यात आली .