पुणे दि २२ : -जम्बो कोविड सेंटर पूर्ण क्षमतेने कार्यान्वित करून जास्तीत जास्त रुग्णांना येथे सेवा देण्यास प्राधान्य द्यावे. येथे इतर व्याधी असणाऱ्या (कोबॉर्बिड) करोना रुग्णांना सर्व उपचार मिळावेत यासाठी संबंधित सुपरस्पेशालिस्ट डॉक्टर नियुक्त करावेत अशा सूचना आरोग्यमंत्री राजेश टोपे यांनी केल्या.आरोग्यमंत्री राजेश टोपे यांनी आज (सोमवारी) COEP मैदानावरील जम्बो कोविड सेंटरची पाहणी करून आढावा बैठक घेतली. यावेळी त्यांनी जम्बो सेंटरसह पुणे शहर व जिल्ह्यातील परिस्थितीची तपशीलवार माहिती घेतली. यावेळी विभागीय आयुक्त सौरभ राव, जिल्हाधिकारी राजेश देशमुख, पुणे मनपा आयुक्त विक्रम कुमार, अतिरिक्त मनपा आयुक्त व जम्बो कोविड रुग्णालयाच्या कार्यकारी अध्यक्षा रुबल अग्रवाल व इतर प्रमुख अधिकारी उपस्थित होते. जम्बो सेंटरमधील करोना रुग्ण बरे झालेल्या रुग्णांचे पुष्पगुच्छ, मास्क देऊन आरोग्यमंत्री टोपे यांनी स्वागत केले व त्यांची विचारपूस केली.जम्बो सेंटरमधील सहव्याधी रुग्णांना करोनासोबतच इतर आवश्यक तातडीचे उपचार देण्यासाठी हृदयरोगतज्ञ, मूत्रपिंडतज्ञ असे विविध सुपरस्पेशालिस्ट डॉक्टरांची नियुक्ती करावी. उर्वरित बेड कार्यान्वित करावेत. येथे स्वच्छता, आरोग्यदायी जेवण देण्यात येत आहे. ते पुढेही सातत्याने देण्यात यावे. मृत्यूचे प्रमाण कमी करण्यासाठी रात्री वरिष्ठ डॉक्टर उपलब्ध राहतील याची दक्षता घ्यावी. 02025502110/ 25502525/ 26 या हल्पेलाईन क्रमांकांचा नागरिकांनी वापर करावा. तसेच, प्लाझ्मा संबंधी व्यवस्थापनासाठी एक स्वतंत्र पथक असावे, अशा सूचना आरोग्यमंत्री टोपे यांनी यावेळी दिल्या.ऑक्सिजन बेड, आयसीयू बेडची व्यवस्था, येथील कमांड सेंटरमधील माहिती तंत्रज्ञान प्रणाली, जम्बो रुग्णालयाचे एकूण व्यवस्थापन याबाबत रुबल अग्रवाल यांनी सादरीकरण केले. जम्बोची क्षमता लवकरात लवकर वाढविण्याच्या दृष्टीने पुढील कार्यवाही करणार असल्याचे त्यांनी सांगितले.