पुणे, दि. 12 : प्रादेशिक परिवहन कार्यालय पुणे येथे दुचाकी वाहनांसाठी नवीन मालिका सुरू करण्यात येत आहे. यासाठी ज्यांना खाजगी चारचाकी वाहनांना आकर्षक तसेच पसंतीचे क्रमांक विहित शुल्क भरून हवे असतील त्यांनी दि. 14 ऑक्टोबर 2020 रोजी कार्यालयीन वेळेत सकाळी 10.30 ते दुपारी 2.30 या दरम्यान विहित नमुन्यातील अर्जांमध्ये कार्यालयाच्या खाजगी वाहन विभागात डी डी, पत्त्याचा पुरावा, ओळखपत्र, पॅनकार्डच्या साक्षांकित प्रतीसह जमा करावा. एकाच नंबरकरीता एकापेक्षा जास्त अर्ज आल्यास त्यांची यादी दि. 15 ऑक्टोबर 2020 रोजी सकाळी 10.30 वाजता कार्यालयीन नोटीसबोर्डवर लावण्यात येईल. सदर अर्जांसाठी त्याच दिवशी दुपारी 4. 30 सहा. प्रादेशिक परिवहन अधिकारी, नवीन वाहन नोंदणी विभाग यांच्या दालनात लिलाव करण्यात येईल.
ज्या दुचाकी वाहनांना आकर्षक तसेच पसंतीचे क्रमांक विहित शुल्क भरून हवे असतील त्यांनी दि. 15 ऑक्टोबर 2020 रोजी कार्यालयीन वेळेत सकाळी 10.30 ते दुपारी 2.30 या दरम्यान विहित नमुन्यातील अर्जांमध्ये कार्यालयाच्या खाजगी वाहन विभागात जमा करावेत. यामध्ये एकाच नंबरकरीता एकापेक्षा जास्त अर्ज आल्यास त्यांची यादी दि. 16 ऑक्टोबर 2020 रोजी 10.30 वाजता कार्यालयीन नोटीसबोर्डवर लावण्यात येईल. सदर अर्जांसाठी त्याच दिवशी दुपारी 4.30 वाजता सहकार सभागृहामध्ये लिलाव करण्यात येईल.
सदर डीडी “R.T.O., Pune यांच्या नावे नॅशनलाईज/शेडयुल्ड बँकेचा पुणे येथील असावा तसेच तो दोन महिन्यांपेक्षा जास्त जुना नसावा. त्यासोबत अर्जदारास पॅनकार्डची साक्षांकित प्रत जोडणे अनिवार्य राहील. लिलावाकरीता जमा करण्यात येणारा डीडी हा सीलबंद पाकीटात जमा करावा. Pune R.T.Oया नावाने सादर केलेले डीडी बाद केले जातील. तसेच विहित शुल्कापेक्षा कमी रक्कमेचे असलेले डीडी सुध्दा बाद केले जातील.
एकदा राखून ठेवलेला नोंदणी क्रमांक बदलून देता येणार नाही. नोंदणी क्रमांक राखून ठेवलेल्या दिनांकापासून 30 दिवसांच्या आत नोंदणीसाठी वाहन सादर केले नाही तर राखून ठेवलेला नोंदणी क्रमांक आपोआप रद्द होईल व फी सरकारजमा होईल. कोणताही विशिष्ट नोंदणी क्रमांक राखीव ठेवण्यासाठी प्रदान केलेली फी, कोणत्याही परिस्थितीत परत करता येणार नाही अथवा त्याचे समायोजन करता येणार नाही.
नवीन दुचाकी मालिकेच्या वेळापत्रकानुसार दि.14 ऑक्टोबर 2020 रोजी तिप्पट शुल्क (एलएमव्ही) चे अर्ज स्विकारणे, दि.15 ऑक्टोबर 2020 रोजी तिप्पट शुल्काच्या आलेल्या अर्जांसाठी लिलाव, दि.15 ऑक्टोबर 2020 रोजी दुचाकी वाहनांसाठी अर्ज स्विकारणे तसेच 16 ऑक्टोबर 2020 रोजी दुचाकी वाहनांसाठी आलेल्या अर्जांचा लिलाव करण्यात येईल, असे सहा.प्रादेशिक परिवहन अधिकारी,पुणे यांनी कळविले आहे.