पुणे,दि.२८:- पुणे शहरात ‘डिजिटल अरेस्ट’च्या नावाखाली ज्येष्ठ नागरिकाची तब्बल १० कोटी ७४ लाख ६५ हजार रुपयांची ऑनलाईन फसवणूक करणाऱ्या टोळीतील दोन आरोपींना सायबर पोलिसांनी अटक केली आहे. या प्रकरणी सायबर पोलीस ठाण्यात भारतीय न्याय संहिता कलम ३०८(२), ३१९(२), ३४ तसेच माहिती तंत्रज्ञान अधिनियम ६६ (सी), ६६ (डी) अन्वये गुन्हा दाखल करण्यात आला आहे.
फिर्यादी असलेल्या ७२ वर्षीय ज्येष्ठ नागरिकाला २३ सप्टेंबर ते २९ सप्टेंबर २०२४ या कालावधीत अज्ञात आरोपींनी ‘डिजिटल अरेस्ट’ची भीती दाखवली. आधार कार्डावरून बनावट बँक खाते उघडल्याचा आरोप करून कुटुंबीयांना अटक होईल, अशी धमकी देण्यात आली. स्वतःला सीबीआय व सायबर अधिकारी असल्याचे भासवून आरोपींनी फिर्यादीकडून वेगवेगळ्या बँक खात्यांमध्ये रक्कम ट्रान्सफर करून घेतली.
तपासादरम्यान पोलिसांनी संबंधित बँक व्यवहारांचे तांत्रिक विश्लेषण केले असता काही रक्कम कर्नाटकातील एटीएममधून काढण्यात आल्याचे निष्पन्न झाले. सीसीटीव्ही फुटेजच्या आधारे आरोपींची ओळख पटवण्यात आली.
आरोपी ईश्वर सुभाष बनसोडे (वय २३, रा. छत्रपती संभाजीनगर) व समीर सुरेश सुखदेव (वय २४, रा. कर्नाटक) यांना ताब्यात घेण्यात आले असून न्यायालयाने त्यांना २७ फेब्रुवारी २०२६ पर्यंत पोलीस कोठडी सुनावली आहे. तपासात रोहन रामेश्वर जाधव (रा. छत्रपती संभाजीनगर) व अफसर अत्तारी (रा. सोलापूर) यांचा सहभाग निष्पन्न झाला आहे.
आरोपी परदेशातील व्यक्तींशी संपर्कात असून संघटित पद्धतीने गुन्हे करत असल्याचा संशय पोलिसांनी व्यक्त केला आहे. आतापर्यंतच्या तपासात ११ फसवणूक प्रकरणांमध्ये त्यांचा सहभाग असल्याचे उघड झाले आहे.
दरम्यान, पोलिसांनी आतापर्यंत सुमारे ४० लाख रुपये गोठवण्यात यश मिळवले असून ४ लाख ८७ हजार ५०० रुपये रोख जप्त केले आहेत. पुढील तपास सुरू आहे.
