पिंपरी-चिंचवडमध्ये फिल्मी स्टाईलने लूट करणाऱ्या टोळीचा पोलिसांच्या जाळ्यात; पाच आरोपी अटक

पिंपरी-चिंचवड,दि.२० :- पिकअप वाहनातून रोकड घेऊन जाणाऱ्या व्यक्तीला रस्त्यात अडवून पिस्तुलासारखी वस्तू दाखवत धमकावून लुटणाऱ्या पाच आरोपींना पिंपरी-चिंचवड गुन्हे शाखेच्या युनिट-४ च्या पथकाने अटक केली. आरोपींकडून ११ लाख ६८ हजार ५०० रुपयांचा मुद्देमाल हस्तगत करण्यात आला आहे.
दिनांक १० ऑगस्ट २०२६ रोजी रात्री सुमारे १०.५० वाजता गुडविल कंपनीतील फिर्यादी धीरज यादव व पिकअप वाहनचालक रामभवन सिंह हे दक्षिण म्हाळुंगे पोलीस ठाण्याच्या हद्दीतील खरबवाडी येथील एचडीएफसी बँकेच्या एटीएममधून गुडविल ट्रान्सपोर्टचे ९ लाख रुपये रोख घेऊन पिकअप वाहनाने जात होते.
खराबवाडी येथील हिंदवी कार सेंटरसमोर आरोपींनी पिकअप वाहनाला पांढऱ्या रंगाची इर्टिगा कार आडवी लावली. त्यानंतर दोन आरोपींनी लाल रंगाच्या स्कूटीवरून येत फिर्यादी व वाहनचालकाला पिस्तुलासारखी वस्तू दाखवून पैसे देण्याची धमकी दिली. त्यांना मारहाण करून फिर्यादीच्या खिशातील १ लाख ६ हजार रुपये जबरदस्तीने काढून घेऊन आरोपी पसार झाले.
या प्रकरणी दक्षिण म्हाळुंगे पोलीस ठाण्यात गुन्हा दाखल करण्यात आला. गुन्ह्याचे गांभीर्य लक्षात घेऊन गुन्हे शाखा युनिट-४ च्या पथकाने तपास सुरू केला. घटनास्थळ व परिसरातील १२० सीसीटीव्ही फुटेजची तपासणी, तसेच संशयित व्यक्तींच्या सीडीआर व तांत्रिक विश्लेषणाच्या आधारे आरोपींचा माग काढण्यात आला.
तपासादरम्यान सार्थक पोपट दाते (वय २१), अजित बर्नी पारशी (वय २२), सत्यवान सुनील देवकर (वय १९), हनुमंत भास्कर दाते (वय २७) आणि यश सोमनाथ पवार (वय २०) या पाच आरोपींना ताब्यात घेण्यात आले. त्यांच्याकडून गुन्ह्यात वापरलेली इर्टिगा कार, मोटारसायकल, सहाचाकी पिकअप, मोबाईल फोन आणि २६ हजारांची रोकड, असा एकूण ११,६८,५०० रुपयांचा मुद्देमाल हस्तगत करण्यात आला आहे.
ही कारवाई पोलीस आयुक्त विनय कुमार चौबे, पोलीस सहआयुक्त डॉ. शशिकांत महावरकर, अपर पोलीस आयुक्त (गुन्हे) संजय आडे, पोलीस उपआयुक्त (गुन्हे) रोहिदास पवार यांच्या मार्गदर्शनाखाली करण्यात आली. पोलीस निरीक्षक अर्जुन घोडेपाटील यांच्या नेतृत्वाखाली सहाय्यक पोलीस निरीक्षक श्रीधर भोसले व त्यांच्या पथकाने ही कारवाई केली.