पिंपरी चिंचवड दि ०२ : -दरोड्याच्या तयारीच्या प्रयत्नातील सराईत दोन गुन्हेगारांना पोलिसांनी अटक केली. घरफोडीचे १२ तर वाहनचोरीचे आठ गुन्हे उघडकीस आले असून त्यांच्याकडून ३० लाख ६०० रुपयांचे सोन्या-चांदीचे दागिने, रोख रक्कम, तीन टीव्ही, पाच चारचाकी वाहने, चार दुचाकी हस्तगत केल्या आहेत.
पिंपरी-चिंचवड पोलिसांच्या गुन्हे शाखेच्या दरोडा, विरोधी पथकाने ही कारवाई केली.सुरजितसिंग राजपालसिंग टाक (वय ३२), जितसिंग राजपालसिंग टाक (वय २६, दोघे रा. हडपसर, पुणे), असे अटक केलेल्या आरोपींनीचे नाव आहे. पोलीस आयुक्त कृष्ण प्रकाश यांनी दिलेल्या माहितीनुसार, आरोपी सुरजितसिंग व जितसिंग हे दोन्ही इंद्रायणीनगर येथे बँकेचे एटीएम ची चोरी करण्यासाठी हडपसर येथून काही दरोडेखोर चारचाकी गाडीतून येणार असून, त्यांच्याजवळ घातक शस्त्र आहेत अशी खात्रीशीर बातमी मिळाल्याने, सदर ठिकाणी दरोडा विरोधी पथकातील तीन टीम तयार करून, सापळा लावण्यात आला.
दरोडा टाकण्याच्या तयारीत असताना मिळून आले. २३ जानेवारी रोजी त्यांना अटक करण्यात आली. त्यांच्याकडे चाैकशी केली असता, साथीदारांसह त्यांनी पिंपरी-चिंचवड, पुणे शहर व ग्रामीण भागात घरफोडी व वाहनचोरीचे गुन्हे केल्याचे निष्पन्न झाले. आरोपी हे सराईत गुन्हेगार असून, ते टोळीने गुन्हे करतात. गुन्हे करण्यासाठी ते चोरीच्या वाहनांचा वापर करीत होते. चारचाकी वाहन चोरून ते १० ते २० किलोमीटरवर एका ठिकाणी पार्क करीत. त्यानंतर चोरीच्या दुचाकीने त्याठिकाणी जाऊन चोरीच्या चारचाकी वाहनातून घरफोडी किंवा गुन्हे करण्यासाठी जात. घरफोडी करून झाल्यानंतर पुन्हा त्याच ठिकाणी चारचाकी पार्क करून तेथील दुचाकीने चोरीचा मुद्देमाल घेऊन निघून जात.
पिंपरी-चिंचवड शहरातील देहूरोड, पिंपरी, भोसरी, चिंचवड, सांगवी, भोसरी एमआयडीसी, निगडी, चिखली, दिघी, वाकड या पोलीस ठाण्यांतील तसेच म्हाळुंगे पोलीस चाैकीत दाखल विविध १७ गुन्हे उघडकीस आले आहेत. तसेच पुणे शहरातील बंडगार्डन व खडकी पोलीस ठाण्यातील प्रत्येकी एक, असे दोन गुन्हे तर पुणे ग्रामीणमधील लोणी काळभोर व मंचर पोलीस ठाण्यातील
प्रत्येकी एक, असे एकूण २१ गुन्हे उघडकीस आले आहेत.
सदर कामगिरी मा पोलीस आयुक्त .कृष्ण प्रकाश, अपर पोलीस आयुक्त पोलीस उप आयुक्त सुधीर हिरेमठ, स पो आ प्रेरणा कट्टे, स पो आ आर आर पाटील , वपोनि उत्तम तांगडे, यांचे मार्गदर्शनाखाली मंगेश भांगे पोलीस उप निरीक्षक, अंमलदार उमेश पुलगंम,महेश खांडे, राहुल खार्गे,विक्रांत गायकवाड,राजेंद्र शिंदे, नितीन लोखंडे, सागर शेडगे, आशिष बनकर, औदुंबर रोंगे, संतोष सकपाळ, गणेश कोकणे, राजेश कोशल, प्रवीण माने यांच्या पथकाने ही कामगिरी केली. या पथकाला ५० हजारांचे बक्षीस पोलीस आयुक्तांनी जाहीर केले आहे.