पुणे,दि.१० ;- पुण्यातील ससून रुग्णालयात उपचाराच्या नावाखाली मुक्‍काम ठोकलेल्या पाच कैद्यांची रवानगी पुन्हा येरवडा कारागृहात करण्यात आली. यामध्ये माजी आमदार अनिल भोसले आणि गुंड रूपेश मारणेचा समावेश आहे.
ससून हॉस्पिटल ड्रग्ज प्रकरण आणि त्यात सहभागी ससूनच्या वॉर्ड नंबर 16 मध्ये न्यायालयीन कैदी असलेला ड्रग्ज माफिया ललित पाटील सर्वप्रथम “वॉर्ड क्रमांक 16, ची विभागीय आयुक्‍तांच्या आदेशाने ससून प्रशासनाने त्रिसदस्यीय कैदी उपचार समिती नेमली. या समितीला 24 तासांत अहवाल देण्याचे आदेश देण्यात आले होते. त्यानुसार समितीने विभागीय आयुक्‍तांना अहवाल सोपवला.
दरम्यान, कारागृह प्रशासनाने दिलेल्या माहितीनुसार, “शिवाजीराव भोसले सहकारी बॅंकेच्या घोटाळ्यातील आरोपी माजी आमदार अनिल भोसले, गुंड रूपेश मारणे, बलात्कारातील आरोपी हेमंत पाटील, प्रवीण राऊत आणि प्रकाश चावला अशा पाच कैद्यांची पुन्हा येरवडा कारागृहात रवानगी करण्यात आली. हे कैदी मागील काही महिन्यांपासून ससूनमध्ये दाखल होते. यातील अनिल भोसले आणि रूपेश मारणे वॉर्ड नंबर 16 मध्ये दाखल होते.’ तर, ससूनच्या भेटीदरम्यान विभागीय आयुक्‍तांनी वॉर्ड नंबर 16 ची झाडाझडती घेतली होती.
तेव्हा वॉर्ड नंबर सोळामध्ये बराच काळ उपचार घेत असलेले कैदी आढळल्याचे त्यांनी माध्यमांना सांगितले होते. ससूनचे अधिष्ठाता डॉ. संजीव ठाकूर म्हणाले, “कैदी उपचार समितीचा अहवाल विभागीय आयुक्‍तांना पाठवण्यात आला आहे. कोणत्या कैद्यांना परत पाठवण्यात आले आहे, हे सांगता येणार नाही. ही गोपनीय बाब आहे.’ दरम्यान, पोलीस आयुक्‍त रितेश कुमार म्हणाले, ललित पाटीलप्रकरणी दहा पथके वेगवेगळ्या दिशेने तपास करत आहेत.
