मुंबई दि, १९ :- अंतर्गत गुण रद्द केल्याने एसएससी विद्यार्थ्यांवर होणारा अन्याय दूर करण्यासाठी सरकारने अकरावी ऑनलाईन प्रवेश प्रक्रियेत जागा वाढवण्याचा निर्णय घेतला आहे. त्यानुसार आर्ट्स, काॅमर्स आणि सायन्स अशा तिन्ही शाखांच्या जागेत वाढ होणार आहे. ११ वीच्या ऑनलाईन प्रवेशाची प्रक्रिया बुधवारपासून सुरू होत आहे. शिक्षणमंत्री आशिष शेलार यांनी घेतलेल्या जागावाढीच्या निर्णयामुळे विद्यार्थ्यांना मोठा दिलासा मिळणार आहे. शिक्षणमंत्री आशिष शेलार यांनी विधानसभेच्या सभागृहात निवेदन केलं. त्यानुसार मुंबई, पुणे, नागपूर येथील ज्युनियर काॅलेजांसाठी त्यांनीवाढीव टक्केवारी जाहीर केली. मुंबईतील ज्युनिअर काॅलेजांमध्ये विज्ञान शाखेसाठी ५ टक्के तर कला आणि वाणिज्य शाखेसाठी ८ टक्के जागावाढ होणार आहे. त्याचबरोबर पुणे आणि नागपूर येथील ज्युनिअर काॅलेजांमध्ये तिन्ही शाखांसाठी १० टक्के जागावाढ होईल. या जागावाढीमुळे राज्यातील एकही विद्यार्थी, विद्यार्थिनी अकरावी प्रवेशापासून वंचित राहणार नाही, असंही त्यांनी यावेळी स्पष्ट केलं. त्यानुसार विद्यार्थ्यांना त्यांच्या आवडत्या काॅलेजांमध्ये प्रवेश घेता येणं सोपं झालं आहे.एसएससी बोर्डाच्या विद्यार्थ्यांचे तोंडी परीक्षांचे अंतर्गत २० गुण रद्द करत १०० गुणांची लेखी परीक्षा घेण्याचा निर्णय शिक्षणमंत्र्यांनी घेतला होता. या निर्णयामुळे एसएससी बोर्डाची जवळपास ४ लाख मुलं नापास झाली आहेत. याउलट सीबीएसई आणि आयसीएससी बोर्डांनी तोंडी परीक्षांचे गुण विद्यार्थ्यांना देऊ केले आहेत,
बाळू राऊत प्रतिनिधी
