पुणे : पुणे महानगरपालिकेच्या कर आकारणी व कर संकलन विभागामार्फत दरवर्षी मिळकतकर देयकांचे वाटप केले जाते. या देयकांचा निर्धारित मुदतीत भरणा करणे ही संबंधित मिळकतधारकांची जबाबदारी आहे. नागरिकांकडून जवळच्या क्षेत्रीय कार्यालयात तसेच मनपाच्या मुख्य इमारतीतील नागरी सुविधा केंद्रांमध्ये धनादेशाद्वारे कर भरणा केला जातो.
१ एप्रिल २०२५ पासून अनेक नागरिकांनी मिळकतकराचा भरणा धनादेशाद्वारे केला आहे. मात्र काही प्रकरणांमध्ये धनादेशातील त्रुटी, बँक खात्यातील अपुरी शिल्लक किंवा इतर तांत्रिक कारणांमुळे संबंधित धनादेश वटलेले नाहीत.
यामुळे अशा मिळकतधारकांना Negotiable Instruments Act 1881 च्या कलम 138 अन्वये नोटिसा बजावण्यात आल्या आहेत. तरीदेखील काही नागरिकांकडून अद्याप कर भरणा करण्यात आलेला नसून त्यामुळे मनपाचे आर्थिक नुकसान होत आहे.
मनपाकडून स्पष्ट करण्यात आले आहे की, ज्यांचे धनादेश वटले नाहीत त्यांनी तत्काळ मिळकतकराची रक्कम जमा करावी. अन्यथा नियमांनुसार संबंधितांवर फौजदारी कारवाई करण्यात येणार असल्याचा इशारा प्रशासनाने दिला आहे.
