घरफोडीसाठी वाहनचोरी करणाऱ्या सराईत टोळीचा पर्दाफाश; दोन आरोपी अटकेत, ५ वाहनचोरी व २ घरफोडीचे गुन्हे उघड

पिंपरी-चिंचवड, दि. ३० :- चिखली पोलिसांनी घरफोडी करण्यासाठी वाहनांची चोरी करणाऱ्या सराईत गुन्हेगारांच्या टोळीचा पर्दाफाश करत दोन आरोपींना अटक केली आहे. या कारवाईत ५ वाहनचोरीचे व २ घरफोडीचे गुन्हे उघडकीस आले असून, सुमारे ₹२.१५ लाख किमतीची ४ मोटारसायकली आणि १ ऑटो रिक्षा जप्त करण्यात आली आहे.
२६ जुलै २०२६ रोजी चिखली पोलीस ठाण्यात दाखल झालेल्या वाहनचोरीच्या गुन्ह्याचा तपास करताना पोलिसांनी १५० हून अधिक सीसीटीव्ही फुटेजची तपासणी केली. त्यानंतर मिळालेल्या गुप्त माहितीनुसार राज उर्फ ठेक्या बापुडेकर (रा. शिवपर्वती, तळवडे, चिखली) व शंकरसिंग समंदरसिंग टाक (रा. गाडीतळ, हडपसर) यांना ताब्यात घेण्यात आले.
कसून चौकशीत आरोपींनी ५ वाहनचोरी आणि २ घरफोडीचे गुन्हे केल्याची कबुली दिली. त्यांच्याकडून बुलेट, स्प्लेंडर, होंडा शाईन, सुझुकी ॲक्सेस तसेच एक ऑटो रिक्षा असा मुद्देमाल जप्त करण्यात आला.
तपासात उघडकीस आलेले गुन्हे चिखली पोलीस ठाण्यासह हडपसर, मांजरी, येरवडा आणि निगडी पोलीस ठाण्यांच्या हद्दीतील असल्याचे निष्पन्न झाले. अटक आरोपी राज बापुडेकर याच्याविरुद्ध यापूर्वी १२ वाहनचोरीचे गुन्हे दाखल आहेत, तर शंकरसिंग टाक हा सराईत गुन्हेगार असून त्याच्याविरुद्ध ४ गुन्हे दाखल असल्याची माहिती पोलिसांनी दिली.
ही उल्लेखनीय कारवाई पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त बसराज तेली व सारंग आवाड, पोलीस उपायुक्त स्वेता खेडकर, सहायक पोलीस आयुक्त प्रवीण मोरे यांच्या मार्गदर्शनाखाली वरिष्ठ पोलीस निरीक्षक रणजित जाधव, पोलीस निरीक्षक (गुन्हे) अमोल फडतरे, सपोनि. सुभाष चव्हाण तसेच चिखली पोलीस ठाण्याच्या तपास पथकाने यशस्वीरीत्या पार पाडली.