पुणे,दि.०५ : – सार्वजनिक ठिकाणी थुंकणे आणि अस्वच्छता पसरविणाऱ्या नागरिकांविरोधात पुणे महानगरपालिकेने कडक कारवाई केली आहे. स्वारगेट चौक परिसरात रस्त्यावर थुंकणाऱ्या तसेच अस्वच्छता करणाऱ्या नागरिकांवर महापालिकेच्या परिमंडळ क्रमांक ५ अंतर्गत संयुक्त दंडात्मक मोहीम राबविण्यात आली. या कारवाईत २२ नागरिकांकडून एकूण २२ हजार ५०० रुपयांचा दंड वसूल करण्यात आला
रस्त्यावर थुंकल्यामुळे रोगराई पसरण्याचा धोका निर्माण होतो. तसेच सार्वजनिक ठिकाणी अस्वच्छता निर्माण होऊन शहराच्या विद्रूपीकरणात भर पडते. या पार्श्वभूमीवर महापालिकेच्या कसबा पेठ, विश्रामबागवाडा आणि बिबवेवाडी क्षेत्रीय कार्यालयांच्या माध्यमातून नागरिकांमध्ये जनजागृती करण्यात आली. त्याचबरोबर स्वारगेट चौक परिसरात प्रत्यक्ष दंडात्मक कारवाई करण्यात आली.
ही कारवाई परिमंडळ क्रमांक ५ चे उपआयुक्त माधव जगताप यांच्या आदेश व मार्गदर्शनाखाली करण्यात आली. यावेळी उपअभियंता राजेंद्र गायकवाड, वरिष्ठ आरोग्य निरीक्षक राहुल राजगोळकर, आरोग्य निरीक्षक निलेश चव्हाण, तसेच अन्य अधिकारी व कर्मचारी उपस्थित होते.
सार्वजनिक ठिकाणी थुंकणे आणि अस्वच्छता पसरविणाऱ्यांविरोधात यापुढेही नियमितपणे दररोज दंडात्मक कारवाई करण्यात येणार असल्याचा इशारा महापालिका प्रशासनाने दिला आहे. नागरिकांनी शहर स्वच्छ ठेवण्यासाठी सार्वजनिक ठिकाणी थुंकणे व कचरा टाकणे टाळावे, असे आवाहनही करण्यात आले आहे.
