पुणे,दि.०५ :- प्रतिनिधी अवैध दारूविक्री व साठ्यावर आळा घालण्यासाठी गुन्हे शाखा युनिट–७ कडून जोरदार कारवाई करण्यात आली आहे. दिनांक ५ फेब्रुवारी २०२६ रोजी वाघोली पोलीस स्टेशन हद्दीत अवैध दारूविरोधी कारवाई करताना पोलिसांना मोठे यश मिळाले आहे.
मिळालेल्या गुप्त माहितीनुसार भावडी गावाच्या हद्दीतील कानीफनाथ प्लॉटिंग शेजारी, तांबे वस्ती खदानीजवळ इसम गाडीतून हातभट्टीची दारू तयार करत असल्याची माहिती पोलिसांना मिळाली होती. या माहितीनुसार पोलीस निरीक्षक संतोष सोनवणे यांच्या मार्गदर्शनाखाली गुन्हे शाखा युनिट–७ चे पथक घटनास्थळी दाखल झाले.
या छाप्यात
१) प्रल्हाद कदम राठोड (वय २५, रा. भावडी, ता. हवेली)
२) अंकिता गणेश गुड्डावड (वय २३, रा. भावडी, ता. हवेली)
यांना ताब्यात घेण्यात आले.
कारवाईदरम्यान पोलिसांनी सुमारे ८००० लिटर कच्चे रसायन, जमिनीत खोदलेल्या खड्ड्यातील हातभट्टीची दारू, प्लास्टिक कॅन, लोखंडी टोप, लाकडी फण्या आदी साहित्य असा एकूण १,५५,४५० रुपयांचा मुद्देमाल जप्त केला आहे.
या प्रकरणी वाघोली पोलीस स्टेशन येथे गुन्हा रजिस्टर नंबर १७/२०२६ अन्वये महाराष्ट्र दारूबंदी कायदा कलम ६५ (फ), (ब), (क), (ई) अंतर्गत गुन्हा दाखल करण्यात आला असून पुढील तपास वाघोली पोलीस करत आहेत.
सदर कारवाई अपर पोलीस आयुक्त गुन्हे . पंकज देशमुख, उप-आयुक्त गुन्हे निखिल पिंगळे, सहाय्यक आयुक्त गुन्हे–२ श्री. राजेंद्र मुळीक यांच्या मार्गदर्शनाखाली करण्यात आली. या मोहिमेत गुन्हे शाखा युनिट–७ चे अधिकारी व कर्मचारी यांनी सहभाग घेतला.
