पुणे ,दि.१०:-(प्रतिनिधी) :- धनकवडी परिसरातील राजमुद्रा हौसिंग सोसायटीमधील मेहर लिव्हिंग बिल्डिंगच्या तिसऱ्या मजल्यावर विनापरवाना सुरू असलेल्या अवैध हुक्का पार्लरवर सहकारनगर पोलिसांनी ९ फेब्रुवारी २०२६ रोजी छापा टाकून कारवाई केली. या कारवाईत चार जणांविरुद्ध गुन्हा दाखल करण्यात आला असून मोठ्या प्रमाणात हुक्का साहित्य जप्त करण्यात आले आहे.
सहकारनगर पोलीस ठाण्याचे अधिकारी पेट्रोलिंग करत असताना पोलीस हवालदार अमोल पवार यांना बातमीदारामार्फत संबंधित ठिकाणी अवैध हुक्का पार्लर सुरू असल्याची माहिती मिळाली. ही माहिती वरिष्ठ पोलीस निरीक्षक विठ्ठल पवार यांच्या निदर्शनास आणून दिल्यानंतर तपास पथक तयार करून तात्काळ छापा टाकण्यात आला.
पोलिसांनी तिसऱ्या मजल्यावरील टेरेसवर प्रवेश करताच आत ५ टेबल मांडलेले आढळले. त्यापैकी ४ टेबलवर ग्राहक हुक्क्याचे सेवन करताना दिसून आले. पोलिसांनी कारवाई करत हॉटेल मालक व कर्मचाऱ्यांची चौकशी केली असता आरोपींची नावे –
राजसिंग भजनसिंग गोरेजोड (वय ३५),
पारस भगवान शर्मा (वय २४),
हिमेन्द्र मोला तिवारी (वय ३५) आणि
नारायण मेघे आचार्य (वय ३४)
अशी असल्याचे समोर आले.
छाप्यात विविध फ्लेव्हरचा तंबाखू, चिलिम, हुक्का पॉट, नळी तसेच इतर साहित्य असा सुमारे १२ हजार ४५५ रुपयांचा मुद्देमाल जप्त करण्यात आला. या प्रकरणी सहकारनगर पोलीस ठाण्यात भारतीय न्यायसंहिता कलम २२३ तसेच सिगारेट व अन्य तंबाखूजन्य उत्पादने (महाराष्ट्र सुधारणा) अधिनियम २०१८ अंतर्गत गुन्हा दाखल करण्यात आला आहे.
ही कारवाई अपर पोलीस आयुक्त (पश्चिम विभाग) राजेश बनसोडे, उपायुक्त परिमंडळ-२ मिलिंद मोहिते, सहाय्यक आयुक्त धनंजय घोडसे, वरिष्ठ पोलीस निरीक्षक विठ्ठल पवार यांच्या मार्गदर्शनाखाली पोलीस उपनिरीक्षक गणेश कर्वे व त्यांच्या पथकाने केली.
