सहकार मंत्रालयाच्या पंचवर्षपूर्ती निमित्त सहकार सप्ताहाचे आयोजन

पुणे, २५ जून : – केंद्रीय सहकार मंत्रालयाच्या स्थापनेला यंदा म्हणजे २०२६ मध्ये पाच वर्ष पूर्ण होत आहेत. यानिमित सहकार आयुक्त व निबंधक, सहकारी संस्था, महाराष्ट्र राज्य यांच्यातर्फे येत्या२९ जून ते ६ जुलै या कालावधीत सहकार सप्ताह साजरा करण्यात येणार आहे.
या सप्ताहानिमित पुणे, मुंबई आणि सांगली येथे विविध कार्यक्रम आयोजित केले जाणार आहेत, अशी माहिती राज्याचे सहकार आयुक्त आणि निबंधक (सहकारी संस्था) दीपक तावरे यांनी पत्रकार परिषदेत दिली. यावेळी महाराष्ट्र राज्य सहकारी बँकेचे प्रशासक विद्याधर अनास्कर, महाराष्ट्र हौसिंग अॅड अपार्टमेंट फेडरेशनचे अध्यक्ष सुहास पटवर्धन, महाराष्ट्र राज्य सहकारी पतसंस्था फेडरेशनचे अध्यक्ष अॅड. सचिन पटवर्धन, महाराष्ट्र अर्बन बँक फेडरेशनचे अध्यक्ष अॅड. सुभाष मोहिते, महाराष्ट्र राज्य सहकारी संघाचे मुख्य कार्यकारी अधिकारी राजेंद्र दराडे उपस्थित होते.
या सप्ताहनिमित पुण्यातील कोथरूड येथील यशवंतराव चव्हाण नाट्यगृहात २७ जून रोजी सकाळी ९.०० वाजता, ‘सहकार धोरणाविषयी जागरूकता’ या विषयावर आणि रविवार दिनांक २८ जून रोजी सकाळी ९.०० वाजता ‘सहकारी क्षेत्रातील सचोटी’ या विषयावर परिसंवादाचे आयोजन करण्यात आले आहे.
सोमवार दिनांक २९ जून रोजी सकाळी ९.०० वाजता, सक्सेस क्लब, क्लब हाऊस, डॉ. होमी भाभा रोड, एनसीएल को-ऑपरेटिव्ह हाऊसिंग सोसायटी पंचवटी, पाषाण, पुणे येथे सहकार ध्वज फडकविण्यात येऊन सहकार वृध्दीसाठी शपथ घेतली जाणार आहे. त्यानंतर पंचवटी, पाषाण रस्ता येथे वृक्षारोपण करण्यात येणार आहे. याच ठिकाणाहून इंटरनॅशनल सेंटर पर्यंत सहकार दिंडी काढण्यात येणार आहे. यानंतर सकाळी ११.०० वाजता इंटरनॅशनल सेंटर येथे ‘सहकारातील एकता आणि कृती’ या विषयावर परिसंवाद होणार आहे. बुधवार दिनांक २ जुलै रोजी शिवाजी नगर येथील इन्स्टिट्यूट ऑफ इंजिनिअर्स येथे ‘रेन वॉटर हार्वेस्टींग आणि सौरऊर्जा’ या विषयासंदर्भात कर्नल शशिकांत दळवी मार्गदर्शन करणार आहेत.
तसेच शनिवार दिनांक ४ जुलै रोजी सकाळी १०.०० वाजता बृहन्महाराष्ट्र कॉलेज ऑफ कॉमर्स (बीएमसीसी) येथे महाराष्ट्रातील पहिल्या बहुउ‌द्देशीय युवा को-ऑप. सोसायटीची स्थापना करण्यात येणार आहे. विविध प्रकारचे शिक्षण घेणाऱ्या आणि वैविध्यपूर्ण काम करणाऱ्या १८ ते ३५ या वयोगटातील युवक-युवतींचा सहभाग या सोसायटीमध्ये असेल. या युवकांच्या कौशल्या विकासासाठी ही सोसायटी प्रयत्न करणार असून राज्य आणि केंद्र सरकारच्या विविध योजनांची माहिती देण्यात येणार आहे.
या सप्ताहानिमित्त सहकार क्षेत्राचे महत्त्व, सहकार क्षेत्रातील महाराष्ट्राचे योगदान, सहकार आणि कृत्रिम बुध्दीमता, सहकार आणि सायबर गुन्हेगारी अशा विविध विषयांवर त्या त्या क्षेत्रातील तज्ज्ञ मार्गदर्शन करणार आहेत. यासाठी राज्यातील सर्व आमदार, खासदार, पुणे आणि पिंपरी-चिंचवड महानगरपालिकांचे आयुक्त महापौर, नगरसेवक, जिल्हा परिषदांचे अध्यक्ष, पोलिस आयुक्त अशा मान्यवरांना आमंत्रित करण्यात आले असून नागरिकांनी या कार्यक्रमांना उपस्थित राहून सहकार क्षेत्रातील आपला सहभाग नोंदवावा, असे आवाहन करण्यात आले आहे.