पुणे : शहरात दुचाकी चोरी करणाऱ्या सराईत चोरट्याला अटक करून त्याच्याकडून १४ गुन्ह्यांचा उलगडा करण्यात उत्तमनगर पोलिसांना यश आले आहे. आरोपीकडून सुमारे २१ लाख रुपये किमतीच्या १४ दुचाकी जप्त करण्यात आल्या आहेत.
फिर्यादी संजय लक्ष्मण राऊत (वय ४१, रा. मोरे रेसिडेन्सी, मोरेनगर, उत्तमनगर) यांनी दिलेल्या तक्रारीनुसार १८ फेब्रुवारी २०२५ रोजी त्यांच्या घरासमोर पार्क केलेली होंडा कंपनीची दुचाकी (क्र. MH12…) अज्ञात चोरट्याने चोरून नेली होती. याप्रकरणी उत्तमनगर पोलीस ठाण्यात गुन्हा दाखल करण्यात आला होता.
तपासादरम्यान पोलिसांनी सीसीटीव्ही फुटेज व तांत्रिक विश्लेषणाच्या आधारे संशयित मेघराज उर्फ राजू धापा (वय २७, रा. पंडित कॉलनी, कोंढवे धावडे) याला ताब्यात घेतले. चौकशीत त्याने पुणे शहरातील विविध भागांतून दुचाकी चोरी केल्याची कबुली दिली.
पोलिसांनी केलेल्या तपासात उत्तमनगर, कात्रज, वारजे, भारती विद्यापीठ, सिंहगड रोड, तळेगाव दाभाडे, राजगड व बावधन या पोलीस ठाण्यांतील एकूण १४ गुन्ह्यांचा उलगडा झाला आहे. आरोपीकडून विविध कंपन्यांच्या १४ दुचाकी जप्त करण्यात आल्या असून त्यांची एकूण किंमत अंदाजे २१ लाख रुपये आहे.
ही कारवाई पोलीस आयुक्त अमितेश कुमार, सहपोलीस आयुक्त रंजनकुमार शर्मा यांच्या मार्गदर्शनाखाली वरिष्ठ पोलीस निरीक्षक राजेंद्र हिरेमठ तसेच तपास पथकातील पोलीस अधिकारी व कर्मचाऱ्यांनी केली.
