पुणे,दि.०६ : – शहरात बेकायदेशीररित्या वास्तव्य करणाऱ्या बांगलादेशी नागरिकांवर फरासखाना पोलिसांनी धडक कारवाई करत ४ महिला व ९ पुरुषांना ताब्यात घेतले आहे. ही कारवाई बुधवार पेठ परिसरातील रेडलाइट एरियामधील जनता बिल्डिंग येथे करण्यात आली.
पोलिस आयुक्त अमितेश कुमार यांच्या आदेशानुसार बांगलादेशी नागरिकांचा शोध घेऊन कारवाई करण्याचे निर्देश देण्यात आले होते. त्यानुसार पोलिस उपआयुक्त झोन-१ कृपेश रावले यांच्या मार्गदर्शनाखाली फरासखाना पोलिस ठाण्याचे वरिष्ठ पोलिस निरीक्षक प्रशांत भसे यांच्या नेतृत्वाखाली विशेष पथक तयार करण्यात आले.
या पथकाने बुधवार पेठ येथील जनता बिल्डिंग परिसरात छापा टाकला. या कारवाईत ४ बांगलादेशी महिला व ९ पुरुष आढळून आले. चौकशीत संबंधित महिला वेश्या व्यवसायात गुंतल्याचे निष्पन्न झाले. याप्रकरणी फरासखाना पोलिस ठाण्यात पीटा कायद्याअंतर्गत गुन्हा दाखल करण्यात आला आहे.
या प्रकरणात भूपसिंग श्रीमंगलसिंग राजपूत (वय २८, रा. बुधवार पेठ, पुणे) याला अटक करण्यात आली असून इतर आरोपींचा शोध सुरू आहे. पुढील तपास वरिष्ठ पोलिस निरीक्षक प्रशांत भसे करीत आहेत.
ही कारवाई पोलिस आयुक्त अमितेश कुमार, सहआयुक्त रंजनकुमार शर्मा, अपर पोलिस आयुक्त राजेश बनसोडे, पोलिस उपआयुक्त कृपेश रावले तसेच सहाय्यक पोलिस आयुक्त अनुजा देशमुख यांच्या मार्गदर्शनाखाली करण्यात आली.
