पुण्यातील गणपती दर्शनाला आलेल्या महिलांच्या गळ्यातील दागिने लंपास करणारा आरोपी; फासाखाना पोलिसांच्या जाळ्यात

पुणे,दि.२४ :- गणपती दर्शनासाठी आलेल्या महिलांच्या गर्दीचा फायदा घेत त्यांच्या गळ्यातील सोन्याचे दागिने चोरी करणाऱ्या दोन महिलांसह एका पुरुषाला फासाखाना पोलिसांनी ताब्यात घेतले आहे. आरोपींकडून सुमारे २ लाख ५९ हजार १४० रुपये किमतीचे १८.५१० ग्रॅम वजनाचे सोन्याचे दागिने व लोखंडी कटर हस्तगत करण्यात आला आहे. या कारवाईत फासाखाना पोलीस ठाण्यातील दोन आणि विश्रामबाग पोलीस ठाण्यातील तीन, अशा एकूण पाच गुन्ह्यांची उकल करण्यात पोलिसांना यश आले आहे.
दिनांक २० सप्टेंबर २०२६ रोजी रात्री सुमारे ९ वाजता मनीषा व्याहळसिंग साबळे (वय २७, रा. कोथरूड, पुणे) या नातेवाईकांसह दगडूशेठ गणपती उत्सवाचे दर्शन घेण्यासाठी आल्या होत्या. छत्रपती शिवाजी महाराज सार्वजनिक रस्त्यावरील स्टॉलसमोर गर्दीचा फायदा घेत अज्ञात चोरट्याने त्यांच्या गळ्यातील सोन्याच्या दोन वाट्या व चार मणी तसेच साक्षीदार यांच्या गळ्यातील सोन्याच्या दोन वाट्या व काळे असा एकूण सुमारे ३२ हजार रुपये किमतीचा ऐवज चोरून नेला होता.
याप्रकरणी फासाखाना पोलीस ठाण्यात भारतीय न्याय संहिता कलम ३०३(२) अन्वये गुन्हा दाखल करण्यात आला होता.
गुन्ह्याचे गांभीर्य लक्षात घेऊन पोलीस उपआयुक्त कृषीकेश रावले यांनी फासाखाना विभागाचे प्रभारी संदीप देशमाने यांना तपासाबाबत सूचना दिल्या. त्यानुसार पोलीस उपनिरीक्षक राजेंद्र पाटोळे यांच्या मार्गदर्शनाखाली गजानन सोनुने, अजिम शेख, महेश राठोड आणि नितीन जाधव यांचे पथक तयार करण्यात आले.
पोलिसांनी पेट्रोलिंगदरम्यान मिळालेल्या गोपनीय माहितीच्या आधारे आरोपी महिला आरती आकाश चव्हाण (वय २२, रा. मिटमिटा, जि. छत्रपती संभाजीनगर), सुवर्णा रोहित शिंदे (वय ३५, रा. मुपो वरुड, ता. चिखली, जि. बुलढाणा) आणि पुरुष आरोपी रोहित उर्फ दीपक शिंदे (वय ४०, रा. सदर) यांना ताब्यात घेतले.
आरोपींची कसून चौकशी केली असता त्यांच्या अंगझडतीमध्ये सोन्याचे दागिने आणि लोखंडी कटर आढळून आला. त्यांच्याकडून २ लाख ५९ हजार १४० रुपये किमतीचे १८.५१० ग्रॅम वजनाचे सोन्याचे दागिने व लोखंडी कटर हस्तगत करण्यात आला. आरोपींकडून फासाखाना पोलीस ठाण्यातील दोन आणि विश्रामबाग पोलीस ठाण्यातील तीन, असे एकूण पाच गुन्हे उघडकीस आले आहेत.
या कारवाईमुळे गणपती उत्सवातील गर्दीचा फायदा घेऊन दागिने चोरी करणाऱ्या टोळीचा पर्दाफाश झाला आहे. दाखल गुन्ह्यांचा पुढील तपास वरिष्ठ पोलीस अधिकाऱ्यांच्या मार्गदर्शनाखाली महेश राठोड करीत आहेत.
ही उल्लेखनीय कामगिरी पोलीस आयुक्त अमितेश कुमार, पोलीस सहआयुक्त प्रवीण दराडे, अपर पोलीस आयुक्त राजेश बनसोडे, पोलीस उपआयुक्त कृषीकेश रावले यांच्या मार्गदर्शनाखाली करण्यात आली.