पुणे,दि.१२ :- पुणे महानगरपालिका सायकल क्लबच्या वतीने सालाबादप्रमाणे शुक्रवार, दि. 26 जून रोजी एक दिवसीय पुणे ते पंढरपूर सायकल वारीचे आयोजन करण्यात आले आहे. यंदाचे या सायकलवारीचे सहावे वर्ष असून, मागील सहा वर्षांत सायकल क्लबच्या माध्यमातून राबविण्यात आलेल्या विविध उपक्रमांचा आढावा शहर अभियंता श्री. अनिरुद्ध पावसकर यांनी आपल्या प्रस्तावनेत सादर केला.
या सायकलवारीत पर्यावरणपूरक उपक्रमांना विशेष महत्त्व देण्यात आले असून वृक्षारोपण, इंधन बचतीचा संदेश आणि पर्यावरण जनजागृती यांसारखे कार्यक्रम राबविण्यात येणार आहेत. या उपक्रमात पुणे महानगरपालिकेचे सुमारे 75 कर्मचारी व सेवक सहभागी होणार आहेत.
सायकलवारीदरम्यान परिधान करण्यात येणाऱ्या विशेष जर्सीचे अनावरण आज सकाळी 7.30 वाजता पुणे मनपा मुख्य इमारतीत माननीय महापौर श्रीमती मंजुषाताई नागपुरे यांच्या हस्ते करण्यात आले. यावेळी मनपाचे अधिकारी, कर्मचारी आणि सायकल क्लबचे सदस्य मोठ्या संख्येने उपस्थित होते.
पर्यावरण संवर्धन, आरोग्यदायी जीवनशैली आणि इंधन बचतीचा संदेश जनतेपर्यंत पोहोचविण्याच्या उद्देशाने आयोजित करण्यात आलेल्या या सायकलवारीचे सर्व स्तरांतून स्वागत होत आहे.
