पुणे,दि.२८ :- राज्य उत्पादन शुल्क विभागाच्या पुणे-२ कार्यालयाने परराज्यातील मद्याची अवैध वाहतूक व विक्री करणाऱ्यांविरोधात मोठी कारवाई केली आहे. या कारवाईत एकूण ३० लाख ४७ हजार ४० रुपयांचा मुद्देमाल जप्त करण्यात आला असून, दोन आरोपींना अटक करण्यात आली आहे. आयुक्त, राज्य उत्पादन शुल्क महाराष्ट्र राज्य, मुंबई तसेच विभागीय व जिल्हा स्तरावरील वरिष्ठ अधिकाऱ्यांच्या मार्गदर्शनाखाली ही कारवाई करण्यात आली.
वाघोली परिसरात पहिली कारवाई
राज्य उत्पादन शुल्क विभागाच्या आय विभागातील निरीक्षकांनी २६ ऑक्टोबर २०२६ रोजी रात्री सुमारे १०.४५ वाजण्याच्या सुमारास मिळालेल्या गोपनीय माहितीच्या आधारे वाघोली पोलीस ठाण्याच्या हद्दीत, अहिल्यानगर-पुणे महामार्गावरील केसानंद फाटा चौकात सापळा रचला. यावेळी संशयित वाहनाची तपासणी केली असता, हरियाणा राज्यात विक्रीसाठी असलेला विदेशी मद्यसाठा आढळून आला.
या कारवाईत विदेशी मद्याच्या विविध ब्रँडच्या २८७ सिलबंद बाटल्या, तसेच एका महिला कंपनीच्या काळ्या रंगाच्या चारचाकी वाहनासह सॅमसंग कंपनीचा फोल्ड मोबाईल आणि एक मोबाईल फोन असा एकूण २६ लाख १२ हजार ४० रुपयांचा मुद्देमाल जप्त करण्यात आला.
लोणीकाळभोर परिसरात दुसरा छापा
पुढील तपासादरम्यान मिळालेल्या माहितीच्या आधारे लोणीकाळभोर पोलीस ठाण्याच्या हद्दीतील कर्मभूमीनगर, लक्ष्मीनारायण निवास, लेन क्रमांक १, लोणीकाळभोर येथे छापा टाकण्यात आला. या ठिकाणी महाराष्ट्रात विक्रीस प्रतिबंधित असलेला परराज्यातील विदेशी मद्यसाठा आढळून आला.
या कारवाईत विदेशी मद्याच्या विविध ब्रँडच्या व बिअरच्या एकूण ५० सिलबंद बाटल्या, सॅमसंग कंपनीचे फोल्ड मोबाईल व एस-२६ मोबाईल असा एकूण ४ लाख ३५ हजार रुपयांचा मुद्देमाल जप्त करण्यात आला.
अवैध मद्यविक्रीविरोधात कारवाई सुरूच राहणार
दोन्ही कारवायांमध्ये मिळून ३० लाख ४७ हजार ४० रुपयांचा मुद्देमाल जप्त करण्यात आला असून, दोन आरोपींना अटक करण्यात आली आहे. परराज्यातील मद्याची अवैध वाहतूक, साठवणूक आणि विक्री रोखण्यासाठी राज्य उत्पादन शुल्क विभागाकडून तपास व कारवाई तीव्र करण्यात आली आहे.
या कारवाईत राज्य उत्पादन शुल्क विभागाचे निरीक्षक, दुय्यम निरीक्षक, सहाय्यक दुय्यम निरीक्षक आणि जवान सहभागी झाले. पुढील तपास निरीक्षक सत्यवान गोगावले करीत आहेत.
नागरिकांना आवाहन : पुणे जिल्ह्यात अवैध मद्यनिर्मिती, वाहतूक किंवा विक्रीबाबत माहिती असल्यास राज्य उत्पादन शुल्क विभागाशी संपर्क साधावा, असे आवाहन विभागाकडून करण्यात आले आहे.
