पुणे,दि.१० :- वारजे माळवाडी पोलिस ठाण्याच्या हद्दीत बुलेट दुचाकींना मॉडिफाय करून फटाके वाजणारे सायलेंसर बसवून ध्वनीप्रदूषण करणाऱ्या चालकांवर पोलिसांनी प्रभावी कारवाई केली. नागरिकांकडून सतत तक्रारी येत असल्याने पोलिसांनी विशेष मोहीम राबवून ही कारवाई केली.
दि. १० फेब्रुवारी २०२६ रोजी वरिष्ठ पोलिस निरीक्षक महेश बळकवटी यांच्या आदेशानुसार पोलिस उपनिरीक्षक संजय नऱळे यांच्या मार्गदर्शनाखाली तपास पथकाने वारजे, कर्वेनगर व शिवणे परिसरात पेट्रोलिंग करत कारवाई केली. या वेळी मॉडिफाय सायलेंसर लावून मोठा आवाज करणाऱ्या १५ बुलेट दुचाकींवर कारवाई करून त्यांचे सायलेंसर जप्त करण्यात आले.
चौकशीत संबंधित सायलेंसर वारजे येथील रॉयल बाईक सर्व्हिस या गॅरेजमध्ये बसवले जात असल्याचे समोर आले. त्यानुसार पोलिसांनी गॅरेज मालक योगेश दामोदर सपकाळ (वय ३३, रा. औंध) याच्यावर गुन्हा दाखल केला. त्याच्याविरुद्ध भारतीय न्याय संहिता कलम २२३, २७०, २८१, मोटार वाहन कायदा कलम १९०(२) तसेच महाराष्ट्र पोलिस कायद्यांतर्गत कारवाई करण्यात आली आहे.
कारवाईदरम्यान जप्त करण्यात आलेले मॉडिफाय सायलेंसर आरएमडी कॉलेजसमोर रोड रोलरने चक्काचूर करण्यात आले व दुचाकी चालकांचे समुपदेशनही करण्यात आले.
ही कारवाई पोलिस आयुक्त अमितेश कुमार, सहपोलिस आयुक्त रंजनकुमार शर्मा, अपर पोलिस आयुक्त राजेश बनसोडे, मनोज पाटील, संभाजी कदम आदी वरिष्ठ अधिकाऱ्यांच्या मार्गदर्शनाखाली वारजे माळवाडी पोलिसांनी केली.
