रहिवाशांची माहिती पोलीस स्टेशनला न देणाऱ्या घरमालकांवर पुणे शहर पोलिसांची कारवाई; ४ घरमालक व पीजी चालक-मालकांवर गुन्हे दाखल

पुणे,दि.२३ : – पुणे परिसरातील चंदननगर पोलीस स्टेशन हद्दीतील भाडेकरी व पेईंग गेस्ट (पीजी) चालक व मालकांनी भाडेकरू रहिवाशांची माहिती पोलिसांना न दिल्याने चंदननगर पोलिसांनी कठोर कारवाई करत चार जणांविरुद्ध गुन्हे दाखल केले आहेत.
२१ जुलै २०२६ रोजी करण्यात आलेल्या तपासणीदरम्यान संबंधित पीजी चालकांनी रहिवाशांची माहिती चंदननगर पोलीस ठाण्यात सादर केली नसल्याचे आढळले. पोलिस उपआयुक्त (विशेष शाखा) यांनी ३ जुलै २०२६ रोजी जारी केलेल्या आदेशाचे उल्लंघन केल्याप्रकरणी ही कारवाई करण्यात आली.
ही कारवाई पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त मनोज पाटील, पोलीस उपायुक्त अविनाश कुमार, सहाय्यक पोलीस आयुक्त सुनील दोरगे तसेच वरिष्ठ पोलीस निरीक्षक अश्विनी जगताप यांच्या मार्गदर्शनाखाली विशेष शाखा, चंदननगर पोलीस ठाण्याचे गोपनीय पथक आणि एटीसी पथकाने केली.