पुणे,दि.१८ : – पुणे शहर गुन्हे शाखेच्या अनैतिक मानवी वाहतूक व व्यापार प्रतिबंध कक्षाने देहव्यापाराविरुद्ध मोठी कारवाई करत एका लॉजवर छापा टाकून एका पीडित महिलेची सुटका केली असून दोन इसमांविरुद्ध गुन्हा दाखल करण्यात आला आहे.
दि. १० फेब्रुवारी २०२६ रोजी गुन्हे शाखेला गुप्त माहिती मिळाली की दोन एजंट मुलींना देहव्यापारासाठी आणून त्यांच्याकडून वेश्याव्यवसाय करून घेत आहेत. या माहितीच्या आधारे पोलिस निरीक्षक छगन कापसे यांच्या मार्गदर्शनाखाली पोलिसांनी बनावट ग्राहक पाठवून खात्री केली.
त्यानंतर “वंश लॉज” येथे अचानक छापा टाकण्यात आला. या कारवाईदरम्यान आरोपींनी देहव्यापारासाठी आणलेल्या एका पीडित महिलेची सुटका करण्यात आली.
या प्रकरणी आंबेगाव पोलिस स्टेशन, पुणे येथे
गु.र.नं. ४६/२०२६ अन्वये अनैतिक मानवी वाहतूक (प्रतिबंध) अधिनियम १९५६ च्या कलम ४, ५ तसेच इतर संबंधित कलमांनुसार गुन्हा दाखल करण्यात आला आहे.
ही कारवाई अपर पोलिस आयुक्त (गुन्हे) पंकज देशमुख, पोलिस उपायुक्त निखिल पिंगळे, सहाय्यक पोलिस आयुक्त शंकर खटके यांच्या मार्गदर्शनाखाली करण्यात आली. पोलिस उपनिरीक्षक विशाल चव्हाण, तुषार भिवकर, दत्ताराम जाधव, रेश्मा कंक, अविनाश कोंडे तसेच गुन्हे शाखेच्या पथकाने कारवाईत सहभाग घेतला.
पुढील तपास आंबेगाव पोलिस करत आहेत.
