पुणे,दि.१२:- पुणे शहरातील अनधिकृत होर्डिंग, बॅनर आणि फ्लेक्समुळे होणारे विद्रूपीकरण थांबवण्यासाठी प्रशासनाने कडक भूमिका घेतली असून अवघ्या एका आठवड्यात पुणे शहर होर्डिंगमुक्त करण्याचा निर्धार करण्यात आला आहे.
याबाबत आज झालेल्या पत्रकार परिषदेत पुणे पोलीस आयुक्त अमितेश कुमार व पुणे महानगरपालिकेच्या आयुक्त नवल किशोर राम यांनी सविस्तर माहिती दिली. पुणे पोलीस व पुणे मनपाचे अधिकारी यांच्या संयुक्त कारवाईतून पुण्यातील व शहरभर लावण्यात आलेले सर्व अनधिकृत होर्डिंग, बॅनर आणि फ्लेक्स हटवण्यात येणार आहेत.
विद्रूपीकरण करणाऱ्यांवर कडक कारवाई केली जाणार असून बेकायदेशीर फ्लेक्स छापणाऱ्या प्रिंटिंग प्रेसवरही थेट कारवाई करण्यात येणार आहे. गरज पडल्यास अशा प्रिंटिंग मशीनही जप्त करण्यात येतील, असा इशाराही प्रशासनाने दिला आहे.
या मोहिमेत कोणत्याही प्रकारचा राजकीय हस्तक्षेप सहन केला जाणार नसल्याचे स्पष्ट करण्यात आले. कारवाईत अडथळा आणण्याचा प्रयत्न करणाऱ्या कोणत्याही राजकीय व्यक्तीवरही कायदेशीर कारवाई केली जाईल, असे प्रशासनाने सांगितले.
शहरातील सर्व अनधिकृत अतिक्रमण, फ्लेक्स आणि होर्डिंग हटवून पुणे शहर विद्रूपीकरणमुक्त करण्यासाठी पोलीस आणि महापालिका संयुक्तपणे ही विशेष मोहीम राबवणार असल्याची माहिती यावेळी देण्यात आली.
