पुणे ग्रँड टूर सायकल स्पर्धेची तयारी वेगात; पुण्यात पुणे ग्रँड टूर सायकल स्पर्धेची रोडवरील ३१ ऑक्टोबरनंतर मार्गावर खोदकामास बंदी

पुणे : जानेवारी २०२७ मध्ये होणाऱ्या पुणे ग्रँड टूर सायकल स्पर्धेच्या पार्श्वभूमीवर पुणे शहरातील सायकल स्पर्धेच्या मार्गांची आंतरराष्ट्रीय दर्जानुसार तयारी करण्यासाठी महापालिका प्रशासनाने विविध विभागांना महत्त्वाच्या सूचना दिल्या आहेत. यासंदर्भात शहर अभियंता यांच्या अध्यक्षतेखाली अतिरिक्त पोलीस आयुक्त (वाहतूक विभाग, पुणे शहर), पुणे महापालिकेचे मुख्य अभियंता (पथ) राजेश वनकर तसेच विविध विभागप्रमुख आणि संबंधित अधिकाऱ्यांची ६ ऑक्टोबर २०२६ रोजी मुख्य इमारत, पुणे महापालिका येथे बैठक झाली.
सायकल स्पर्धेच्या मार्गावर विविध ठिकाणी सुरू असलेल्या तसेच प्रस्तावित खोदकामाच्या कामांचा बैठकीत आढावा घेण्यात आला. MNGL, MSDCL, Dinesh Engineering, CCTV Allied Company तसेच पुणे महापालिकेच्या पाणीपुरवठा, ड्रेनेज, विद्युत आदी विभागांच्या अधिकाऱ्यांसोबत समन्वय साधून खोदकामाबाबत निर्णय घेण्यात आले.
आंतरराष्ट्रीय सायकल स्पर्धेसाठी आवश्यक असलेल्या विविध सेवा वाहिन्यांच्या कामांसाठी वाहतूक विभाग, पुणे शहर यांची परवानगी असल्याचे गृहीत धरून संबंधित कामे तातडीने कार्यान्वित करण्याच्या सूचना देण्यात आल्या आहेत. तसेच मुख्य चौकातील रस्ते क्रॉसिंगची कामे प्रामुख्याने शनिवार आणि रविवार या दिवशी वाहतूक विभागाशी समन्वय साधून महापालिकेच्या निर्धारित SOPनुसार पूर्ण करण्याचे निर्देश देण्यात आले आहेत.
या सर्व कामांना ३१ ऑक्टोबर २०२६ अखेरपर्यंत पूर्ण करण्याचे लक्ष्य निश्चित करण्यात आले आहे. त्यानंतर पुणे ग्रँड टूर सायकल स्पर्धेच्या मार्गावर कोणत्याही प्रकारच्या सेवा वाहिन्यांच्या आस्थापनेकरीता खोदकामास परवानगी दिली जाणार नाही, असे संबंधितांना स्पष्ट करण्यात आले आहे.
जानेवारी २०२७ मध्ये होणाऱ्या या आंतरराष्ट्रीय दर्जाच्या सायकल स्पर्धेसाठी रस्ते सुस्थितीत ठेवणे, विविध विभागांच्या कामांमध्ये समन्वय राखणे आणि स्पर्धेच्या मार्गावर वाहतुकीस अडथळा निर्माण होणार नाही याची दक्षता घेण्यावर प्रशासनाने भर दिला आहे. त्यामुळे संबंधित सर्व यंत्रणांनी निर्धारित मुदतीत कामे पूर्ण करून त्यानंतर नव्याने खोदकाम होणार नाही, याची काळजी घेण्याचे आवाहन करण्यात आले आहे.